# Epigram060

Angelicos ciues, et Christi in membra renatos, 
  Non trahat ad ueterem carnis origo hominem. 
Multa quidem in nostros mundus bona procreat usus, 
  Et pleno tellus seruit opima sinu. 
Sed terrae hospitibus, coeli super astra uocatis, 
  Virtutis palma est spernere blanda soli; 
Et sic praesentis spatium percurrere uitae, 
  Ipsa peregrinis ne uia sit laqueus. 
Nam declinantes pro summis ferre laborem, 
  Terrenorum auidos infima suscipient.