# Epigram062

Laetifer immodico naturae elatus honore 
  Angelus, inde hominem subruit, unde ruit. 
Sed Christus miserans deceptum fraude maligni, 
  In se illi ad uitam posse redire dedit: 
Si caueat pactis hostis seruire superbi, 
  Sectari et studeat formam humilis Domini. 
Qui Patris in Deitate manens Deus omnicreator, 
  Verus de sacra Virgine natus homo est. 
Sic nostrum assumens Matris de corpore corpus, 
  Esset ut assumptae carnis origo Deus: 
In quo per lauacrum, fidei uirtute renata, 
  Coeleste accipiet gens noua principium. 
Nil hominis primi retinens, sed plena secundi, 
  Splendore in capitis glorificanda sui.