Ferre parans Christus poenam, mortemque propinquam, Inuictamque suis ingenerare fidem, Cum prece sanguineas fundebat corpore guttas, Et pretium mundi sudor erat Domini. Nec crucis asperitas poterat terrere uolentem Quae regnaturae gloria carnis erat. Sed cruor ille pares sanctis spondebat honores, Orturis toto corpore martyribus. Nam, cum sacra seges terrarum impleuerit orbem, Omnis ab hoc uno semine messis erit.