# Epigram079

Dignus laude quidem est, uitam sine crimine ducens, 
  Et quaecumque sibi sunt nocitura, cauens. 
Sed non hoc pietas contenta est limite claudi, 
  Nec iusto, uetitis abstinuisse, sat est. 
Maior cura boni est, fratrum releuare labores, 
   Et ferre optatum tristibus auxilium: 
Pascere ieiunos, nudos uestire, ligatos 
  Soluere, discordes conciliare sibi, 
Et quaecumque homines miseri solatia quaerunt, 
   Haec, ut possibile est, promere corde pio. 
Vt recti uere cupidus, uereque benignus, 
  Quae mala sunt fugiat, quae bona sunt faciat.