Felices fere faciunt, semperque beatos, De uero et summo gaudia nata bono. Nam mundi ex opibus breuis ac peritura uoluptas, Edita perpetuae semina mortis habet. Non placeat uanis animum submittere rebus, Pestiferisque auidam mentem onerare cibis. Cor mundum et sapiens fructu uirtutis alatur, Et Christi in nostro pectore regnet amor, Quo semel impletus, numquam uacuabitur illo. Aeterna aeterni flumina fontis erunt.