# Epigram083

Quamuis multa homini post uulnera prima supersint, 
  Quae uitam hanc faciant laudis habere decus: 
Si tamen ingenio claro et probitatis amori 
  Fons desit fidei, subdita corda rigans; 
Cunctarum frugum marcescit inutile germen, 
  Nec fruitur uero lumine falsus honor. 
Ignoratus enim Deus, et non credita uirtus, 
  Quae uera ad summum prouehit arte bonum, 
Non sinit eniti regna ad coelestia mentem, 
   Obstructam uanis, occiduisque grauem. 
Perque omnes calles errat sapientia mundi, 
  Et tenebris addit, quae sine luce gerit.