# Epigram090

Magna quidem in multis est excellentia sanctis, 
  Quorum animos superi gratia roris alit. 
Sed dum mens quaedam patitur mala corporis aegri, 
  Et pugnam interius exteriora mouent; 
Numquam ita perfecto capitur uictoria bello, 
  Vera ut securus pace fruatur homo. 
Inter discordes motus contagia serpunt, 
  Ipsaque uirtutum gaudia uulnus habent. 
Vt faciat cunctis longa experientia notum, 
  Non esse hoc plenam tempore iustitiam: 
Ni Dominus miserando lauet delicta suorum; 
  Et dans uirtutum munera, det ueniam.