# Epigram096

Numquam bella bonis, numquam discrimina desunt, 
  Et cum quo certet, mens pia semper habet. 
Quae carnem oblectant, sancto sunt noxia cordi, 
  Contra animi legem praelia corpus habet. 
Pulsant exterius diuersis motibus hostes, 
  Intus ciuile est et sociale malum. 
Vt possit mundi illecebris uitiisque resisti, 
  Vis est corporei mortificanda hominis. 
Sed quae mens recto famulam sub iure tenebit, 
  Edomitae ut regnet carnis in officiis; 
Excelso nisi quae seruit, bene subdita Regi, 
  Vnde est facta uolens, fiat et inde ualens?