Cultor iustitiae, diuinae et pacis amator, Quem uocat ad summum uita beata bonum: Scandere constanter dextros adnitere calles, Despiciens laeuae noxia plana uiae. Tutius est duros mundi tolerare labores, Infestique hostis praelia saeua pati, Quam uictum officiis animum submittere blandis, Captaque seruili subdere colla iugo. Tempore in occiduo non longi est usus honoris, Et celeri lapsu gaudia falsa fluunt. Finem igitur proprii sapiens speculabitur aeui, Et uia qua currit, quo ferat aspiciet. Nam mundo innexis pars est cum principe mundi; At seruis Christi gloria Christus erit.