# Vita S. Martini P Nauta rudis tumido cum vult dare vela profundo atque procellosas nescius itrat aquas, raucisono latrante salo cum perstrepit aequor et vaga terrifico murmurat unda freto, exiliens pelagus colles ubi volvit aquosos planaque dorsa maris mobile rupe tumet, naufragii cumulos rapiens per confraga pontus, qua crepitat rapidus monte natante liquor: certatim inplicitam quatiunt vada caerula cumbam, cum liquidi campi pensile transit iter. si fera crescat hiems, ut spumis verberet auras et mare caeruleum tollat ad astra caput, fluctibus excussus per nubila navita currit, intrat et aerias pendula prora vias. pars subit una ratis, pars altera vergit harenis, nutat et in dubio lubrica freto. nunc sursum inspicitur pelagi furibonda ruina, pontus et iratas desuper armat aquas, nunc quoque prosiliens Zephyri pelagique repulsu fluctibus ex imis evolat acta ratis. afficitur tremulis temerarius arbiter undis et stupet inplicitas quas petat arte vias. attonitus trepidus hebetans vagus anxius anceps confuso ingenio mox ope nauta caret. iamque gubernaclum amittens ratione regendi pondere victus aquae nescius arte iacet. sic ego de modicis minimus, venerabilis Agnes cum Radegunde sacra, quas colo sorte pia, tendere pollicitum quia cogor ad ardua gressum, imperiis tantis viribus impar agor. fluctuat ingenium cui non natat unda Camenae, sensus harenosus non rigat ore lacus. nam celsum meritis Martinum ad sidera notum, cum sint vota, mihi non valet arca loqui. poscendum est vobis, ne naufraga prora laboret, flatibus ille suis ut mea vela iuvet. credere tunc potero ad portum mea carbasa ferri, adspirante fide si sua flabra favent. ferte precanter opem et de verbo poscite verba: si fons ille rigat, rivulus iste meat. vos date quod vobis cum fenore reddat alumnus, addam ut thesauris parva talenta suis.