# De consolatione Philosophiae 03.06 Omne hominum genus in terris simili surgit ab ortu; Vnus enim rerum pater est, unus cuncta ministrat. Ille dedit Phoebo radios, dedit et cornua lunae, Ille homines etiam terris dedit ut sidera caelo; Hic clausit membris animos celsa sede petitos: Mortales igitur cunctos edit nobile germen. Quid genus et proauos strepitis? si primordia uestra Auctoremque deum spectes, nullus degener exstat Ni uitiis peiora fouens proprium deserat ortum.