# De nuptiis 8.805 Tum uix senex reclusis Creperum uidens ocellis Circumspicit ridentes Ictuque suscitante Stupidum dolens tuetur Frictuque palmulari Madidata tergit ora. Tunc motus increpante Baculum rapit Lyaeo, Ac dum mouere gressum Cupit uocante Lyde, Tandem recepta luce Superum uidet senatum. Percellitur repente, Silicerniumque nutans Temptat ciere cursum; Tunc motibus negatis Magis inuolutus astat, Cessimque formidantes Abeunt pedes tremore Titubansque moliensque Haeret, redit, recurrit; Tunc uicta palpitansque Turgens cadit senectus. Fit maior inde risus, Nescit modum Voluptas, Donec iubente Baccho Satyrus rapit iacentem Scapulisque dat supinum Vuidumque hiatimembrem Colloque complicatum Vtribus narem reportat.