# De nuptiis 8.808

Astrigerae iam sedis iter cursumque polorum
Et sacra multiuagos qua tollunt sidera flexus
Dicere tempus adest. uideo splendescere pulsu
Icta corusciferi subitunc laquearia caeli.
Illinc bis septem solitus seruare Triones
Pastor Hyperborea resplendet luce Bootes,
Hinc qua deuexo tellus subducitur axe,
Ignoto Canopos sese infert fulgidus astro.
Phoebeos pariter currus rapidosque meatus
  Et totiens uariae flammantia cornua lunae,
Quin etiam medios quos nectunt culmina circos
Obliqua, et rutulis quo se rapit orbita signis,
Cernere iam uideor. tu fingere ludicra praestas
Viliaque astriloquae praefers commenta puellae!