# sequence for St Michael addressed to Charlemagne

Summi regis archangele
Michahel,
Intende, quaesumus, nostris
Vocibus,
Te namque profitemur esse
Supernorum principem ciuium.
Te deum generi humano
Orante diriguntur angeli,
Ne laedere inimici,
Quantum cupiunt, uersuti
Fessos unquam mortales praeualeant.
Idem tenes perpetui
Potentiam paradisi,
Semper te sancti honorant angeli.
In templo tu dei
Turibulum aureum
Visus es habuisse manibus.
Inde scandens uapor
Aromate plurimo
Peruenit ante conspectum dei.
Tu crudelem cum draconem forti manu straueras,
Faucibus illius animas eruisti plurimas.
Hinc maximum agebatur in caelo silentium,
Millia millium et dicunt: "Salus regi domino".
Audi nos, Michahel,
Angele summe,
Huc parum descende
De poli sede,
Nobis ferendo opem domini
Leuamen atque indulgentiae.
Tu nostros, Gabrihel,
Hostes prosterne,
Tu, Raphael, aegris
Affer medelam,
Morbos absterge, noxas minue
Nosque fac interesse gaudiis
Beatorum.
Has tibi symphonias plectrat sophus, induperator.