Alma Deus Trinitas, quae saecula cuncta gubernas, Adnue iam coeptis, alma Deus Trinitas. Bella Maro resonet; nos pacis dona canamus, munera nos Christi; bella Maro resonet. Carmina casta mihi, fedae non raptus Helenae; luxus erit lubricis, carmina casta mihi. Dona superna loquar, miserae non proelia Troiae; terra quibus gaudet, dona superna loquar. En Deus altus adit uenerandeae Virginis aluum, liberet ut homines, en Deus altus adit. Femina uirgo parit mundi deuota parentem, porta Maria Dei femina uirgo parit. Gaudet amica cohors de Virgine matre Tonantis; uirginitate micans gaudet amica cohors. Huius honor fenuit casto de germine plures, uirgineos flores huius honor genuit: Ignibus usta feris uirgo non cessit Agathe, Eulalia et perfert ignibus usta feris, Kasta feras superat mentis pro culmine Tecla, Eufemia sacras kasta feras superat, Laeta ridet gladios ferro robustior Agnes, Ceclia infestos laeta ridet gladios. Multus in orbe uiget per sobria corda triumphus, sobrietatis amor multus in orbe uiget. Nostra quoque egregia iam tempora uirgo beauit; Aedilthryda nitet nostra quoque egregria. Orta patre eximio, regali et stemmate clara, nobilior Domino est, orta patre eximio. Percipit inde decus reginae et sceptra sub astris; plus super astra manens percipit inde decus. Quid petis, alma, uirum, sponso iam dedita summo? sponsus adest Christus; quid petis, alma, uirum? Regis ut aetherei matrem iam, credo, sequaris, tu quoque sis mater regis ut aetherei. Sponsa dicata Deo bis sex regnauerat annis, inque monasterio est sponsa dicata Deo, Tota sacrata polo celsis ubi floruit actis redditit atque animam tota sacrata polo. Virginis alma caro est tumulata bis oto Nouembres, nec putet in tumulos uirginis alma caro. Xre, tui est operis quia uestis et ipsa sepulchro inuiolata nitet; Xre, tui est operis. Ydros et ater abit sacrae pro uestis honore; morbi diffugiunt, ydros et ater abit. Zelus in hoste furit, quondam qui uicerat Euam; uirgo triumphat ouans, zelus in hoste furit. Aspice, nupta Deo, quae sit tibi gloria terris; quae maneat caelis aspice, nupta Deo. Munera laeta capis, festiuis fulgida taedis; ecce uenit sponsus, munera laeta capis. Et noua dulcisono modularis carmina plectro, sponsa hymno exultas et noua dulcisono. Nullus ab altithroni comitatu segregat Agni, quam affectu tulerat nullus ab althithroni.