# Octosyllables to Nithard

Vale, frater, florentibus
Iuuentutis cum uiribus,
Ut floreas cum Domino
In sempiterno solio,
Qua martyres in cuneo
Regem canunt aethereo,
Prophetae apostolicis
Consonabunt et laudibus,
Qua rex regum perpetuo
Ciues ditat in saeculo,
Iconisma sic Cherubin
Ut et gestes cum Seraphin,
Apostolorum editus
Et prophetarum filius,
Nitharde, nunc nigerrima
Imi cosmi contagia
Temne fauste, Tartarea
Haec contrahunt supplicia,
Altaque super aethera
Rimari petens agmina,
Deum quae semper canticis
Verum comunt angelicis,
Summa sede ut gaudeas
Unaque simul fulgeas,
Excelsi regni praemia
Lucidus captes aurea
Inque throno aethereo
Christum laudes preconio.