Epitaph for a common tomb of nobles and bishops at Hereford
Qui quondam extiterant famosi late per orbem,
corpora sena tenet horum hic marmor adumbrans,
tumbaque mirifico presens fabricata decore
desuper exculpto cohibet cum culmine tecta.
hos ego Cudbertus sacri successor honoris
inclusi tumulis, exornavique sepulchris.
pontifices ex his ternos sacra infula cinxit:
Torthere, Walstod[e] et Tyrhtil sunt nomina, quorum
regulus est quartus Milfrith, cum coniuge digna
Quenburga; exstitit e senis haec ordine quinta.
sextus praeterea est Oshelmi filius Osfrith:
en quorum claudit tumba hic corpora sena.