# Epitaph for St Ecgwine

Iudex adueniet sua premia reddere cunctis
Et quam mira prius fient ostensa, retexam.
Obductus tenebris sol obscuratus obibit
Nec lucis solitum prestabit luna nitorem.
Horrebit celum; tellus discussa dehiscet;
Ac suprema quidem iuga tunc deuexa nutabunt
Et mare terribili confundet murmure gentes.
Tunc superum subito ueniet commota potestas
Cetibus angelicis regem stipata supernum;
Ille sedens solio fulgebit celsus in alto.
Huic assistemus collectis undique turmis,
Iudicium capiens gestorum quisque suorum.
Tunc homines omnes pariter cogentur adesse,
Qui sunt quique fuerunt et quicumque futuri.
Inde tribus populi tundent rea pectora pugnis,
Nam constabit uterque tremens pauperque potensque.
O felix hominum semperque in secula felix
Qui tandem poterit tantas euadere clades,
Et qui cum sanctis letatus in omnia secla
Coniunctus Christo celestia regna tenebit!