Metrical inscription to the 'Benedictional of St Æthelwold'
Presentem biblum iussit perscribere presul
Uuintoniae Dominus quem fecerat esse patronum
magnus Aþeluuoldus, uere gnarus bene Christi
agnos uelligeros ab demonis arte maligna
conseruare; deo fructum quoque reddere plenum
iconomos clarus, uenerabilis atque benignus
hic cupit, arbiter ut uenerit qui discutit orbis
totius factum – quid quilibet egerit – atque
mercedem reddet qualem tunc forte merentur:
aeternam iustis uitam iniustis quoque poenam.
quendam subiectum monachum circos quoque multos
in hoc precepit fieri libro bene comptos,
completos quoque agalmatibus uariis decoratis
multigenis miniis pulchris necnon simul auro.
craxare hunc sibi prescriptus fecit boanarges
idcirco ut soteris populum in biblo potuisset
sanctificare, deoque preces effundere sacras
pro grege commisso, nullum quo perdat ouilis
agniculum paruum, ualeat sed dicere laetus:
‘memet ego adsigno ecce tibi pueros quoque quos tu
seruandos mihi iam dederas; nullum lupus audax
exillis rapuit lurcon temet faciente.
sed simul adstamus uitam cupimusque manentem
percipere, in caelisque frui cum principe summo
cuius membra sumus, caput est qui iure salusque
baptizatorum in patris et natique flaminis almi
nomine clarisono, si non per deuia uergant
sedque fidem teneant factis quoque iussa salutis
perficiant, heresimque omnem de corde repellant;
peccat[i]que malum semper superare studentes
coniuncti domino sint in caelis sine fine.’
hoc cunctis clemens tinctis baptismate sacro
concedat Christus soter est qui rex bonus orbis,
atque patri magno iussit qui scribere librum hunc
aeternum regnum concedat in arce polorum.
omnes cernentes biblum hunc semper rogitent hoc
post metam carnis ualeam caelis inherere:
obnixe hoc rogitat scriptor supplex Godemannus.