Verses from a letter to Boniface
Crescere te Deus omnipotens in opus pietatis
Perpetuo faciat lucro multarum animarum,
Dives opum celi, auscultare Dei merearis
Ut tandem vocem laetam: ‘Bone serveque fide,
Summa tui dominique Dei nunc gaudia scande;
Pauca super fidus fueras quia, multa super te
Constituam’. Requies tibi sit haec certa salusque
Spesque favente Deo pariter, qui cuncta creavit
Ac regnans vivit, seclis prior omnibus idem,
Calce carens et principio. Clementia cuius
Me miserum te larga monebat adire magistrum,
Mole gravi noxae pressus sine lumine cordis;
Otia dum vagabundus amabam dulcia credens,
Quae constant cunctis animabus noxia semper.
Pectoris obtusi tenebras sed gratia dempsit
Salvantis Christi, gratis pia sensibus augens
Dona meis stolidis. Cui laus et honor sine fine.
Atque tui crescat tibi in arce laboris Olimpi
Directi callis ductor mercesque corona
Ingeniique tui, quo sum pars ultima magni.