LVTTING.Beda.Epit
Hoc Christi famuli Bedani membra sepulchro
cum sanctis resurrectura clauduntur honeste;
cuius nunc aeterna capit iam premia laetus
spiritus, angelicis caelo portatus in ulnis.
Qui noua cum priscis ceu diues munera promens
electus fuerat doctor dignusque sacerdos.
Corpore dissolui cupiens et uiuere Christo
et caelestia contemplans terrena nec ambit.
Huius enim titulo nequeo breue scribere plura
cuius ad exemplum mores Britannia rimans
grandisona merito ueneranter laude resultat.
Sexagies decimus iam tunc et nouies nonus
annus ab aduentu Christi de uirgine nati
fluxerat, et trina triplex indictio uiuit;
nonaque Febrarii ter triplicauerat horas
cum gaudens anima ad Christum perducitur alma,
corporis et felix adfatim lumina claudit.
Ast acie uictor regem bellator adorat
ecclesiaeque decus uiuit per saecla beatus.
Discipulus cecinit tuus hos Luttingus amoris
uersus, et miserum me, sancte, tuere, magister.