# Hymns for St Augustine of Canterbury (3)

# F3a
Caelestis aulae nobiles
Mundique recti principes
Concorditer ferant Deo
Laudum tropaea procluo,
Qui maxima clementia
Genus humanum tartara
Terendo vitae reddidit
Et, ut hanc sciret, indidit.
Apostolos nam colligit,
Gregorius de quis venit,
Qui filium dat Anglicis
Augustinum fanaticis.
Non de carnali semine,
Sed spiritali vimine
Emisit, ut Christi decus
Conferret acris plebibus.
Quod ut peregit omnibus
Deo iuvante nisibus,
Vocatur ex tholis poli
Ut collocetur angelis.
Hinc te precamur, artifex
Optime rerum, supplices,
Ut huius ore militis
Tuis tuum des servulis.
Sit gloriae nitor patri,
Sit filio lux et iugis,
Sit procedenti flamini
Ab his venustas luminis.
# F3b
Summa Dei bonitas, caeli que saepta gubernas
Quaeque solum firmas, summa Dei bonitas,
Laudibus eximiis da Augustinum resonemus,
Quem pie sanxisti laudibus eximiis.
Iure salutifero Romae qui nascitur arci,
Nascimur et quo nos iure salutifero.
Clarus in orbe viget; quod contulit ille, dicasti,
Quoque polis renitet, clarus in orbe viget.
Huius ob alloquium nobis miserere, precamur,
Commoda quaeque para huius ob alloquium.
Imperet ista dies, mundemur ut actibus imis,
Deinde salutis opes imperet ista dies.
Gloria magna patri, semper tibi gloria, nate,
Cum sancto spiritu gloria magna patri.
# F3c
Aveto, placidis praesul amabilis,
Aveto, celebri laude notabilis,
Aveto, salubri luce capabilis,
Augustine placabilis.
Nobis ista dies sumptibus innuit,
Quid tu, quis opibus florueris situs,
Cum terris redolens infima presseris,
Augustine placabilis.
Tu factis renitens voceque praeminens,
Tu donis rutilans atque Deo placens,
Tu mundum retinens astrave possidens,
Augustine placabilis.
Non horror nivei tramitis obstitit,
Non gressu tepuit aequoreum iecur
Te, quem forma boni ediderat sibi,
Augustine placabilis.
Iam pastor superis indite gazulis,
Flexis poplitibus cum prece poscimus,
Assis quo clipeus noster in omnibus,
Augustine placabilis.
Exhinc subveniat digna precatio
In sublime tuis perpete servulis,
Quos nutrire studes fastibus aetheris,
Augustine placabilis.
Assit his genitor atque potens Deus,
Aptet Christus et haec patre Deo Deus,
Cum flatu patrio, quo regimur Deo,
Augustine placabilis.