Logogriphs from the 'Cambridge Songs' manuscript
BED 1
Nil herebo melius, celo nil peius habetur;
uilius aut potius quam quod pretio caret est quid?
Bis titiuicilium plumbum numerat trutinando,
ter sese cedit prope peiori meliusque;
plus oneris hoc est, quod iam minus aggrauat Orcam.
BED 2
Littera quae mutata saporem mutat acerbum?
BED 3
Quae sensum uertit monosillaba grammata seruans?
BED 4
Vel quae pars urbem dissillaba uersa patrabit?
BED 5
Nemo supinum non amat omnipotens nec amantes.
BED 6
Quid dat hac illacque meanti pabula panis?
BED 7
Gramma pedem tollit sine sanguine quod copulatum.
BED 8
Quae res sola manet stans recta sodalibus uncis?
BED 9
Littera queque culum facit ut uideat uelut oclus?
BED 10
Si bonus amittit caput admittens onus artat.
BED 11
Peruersus bonus est, breuitatis si caput absit.
BED 12
Quid capite et cauda sicca meat in mare natans?
BED 13
Tres proles nantes iuncte genuere sorores;
rursus easdem post he mature pepererunt.
Manducasse nocent somno; prosunt bene mensa.
BED 14
Vidi cornutam in celo petiisse uolantem,
quam minime peteret si non hanc ipse iuuaret.
BED 15
Quid iugiter cedit cum siuerit omen habebit?
BED 16
Quid quanto crescit tanto mage curtior extat?
BED 17
Quis nolens hospes maris illustrat tenebrosa?
A nullo pastus pascit populum numerosum;
unius arte hominis perit at non fauce ualebit,
una namque die nunquam consumptus abibit.
BED 18
Tres gemini repunt stimulati marmore pellis;
hac illacque uias geminas monstrant uagitando,
atque docent muti fantes cecique uidentes.
Sepe mouentem se fallunt quod it haud ubi mandant;
a se sepe etiam falluntur torta colendo.