Ymnum pro peccatis
Pro peccatis amare
me nunc oportet flere,
ne me conburant dire
flammae profunde paene.
O lacrimae rorate
meum uultum rigate
semper peccaui [multum]:
malum amaui multum.
O lacrimae rorate,
oculi mei flete;
luctum magnum leuate
mea mala lugete.
O unda amabilis
oculorum flebilis
antequam fiat serum
munda criminis genum.
O pupillae nolite
dormitare quiete!
pro me semper rorate
lacrimate et flete.
O lacrimae cedite
meas genos cadete
pectus semper punite
inimicos ledite.
O lacrimarum unda
mihi semper amanda
rogo te: nunc emenda
mea gesta nefanda.
O unda multum mira
lacrimarum amara
ne me consummat ira,
munda nunc mea mala.
O lacrimarum aqua
genarum puni prata
ut sint meae in fine
culpae tam plene purae.
O oculi stillate
meum stratum rigate,
delete nunc per fletum
meum magnum peccatum.
O oculi stillate
caeli regem narrate
ut non timeam crimen
flammae post aeui finem.
O oculi nunc flete
et lacrime stillate
uti in fine uitae
requiescam in pace.