# Hymn for communion

Domine Deus, Iesu,
Via, uita ac ueritas,
Aeternae uitae petimus
Ut nos consortes facias.
Tu de caelis adueniens
Vitam mundo largitus es;
Te panem uitae nouimus
Firmantem corda hominum.
Qui ergo ad te uenerit,
Esuriem non patitur,
Et qui in te crediderit
In aeternum non sitiet.
[Haec] verus enim cibus est
Caro tuo, omnipotens,
Et sanguis tuus, Iesu,
Verus potus fidelium.
Per hoc [sacrum] mysterium
A morte redemisti nos,
Ut firmiter ac sobrie
In te uiuamus, Domine.
Dignare ergo, petimus,
Sancti huius mysterii
Participes nos fieri
Ad laudem tui nominis.
Christe, tuum praeceptum est,
Ut diligamus inuicem;
Sed hoc explere possumus
Adiuti tuo munere.
Ergo in nostris mentibus
Fundatur tua caritas,
Ut tum demum possit in nos
Fraternus amor figere,
Ut non iniquum odium
Neque labor inuidiae
Nec ulla uis malitiae
In cor nostrum resideat.
Et culpas quas contraximus
In carne siti lubrica,
Pro tuo sancto corpore
Remissionem tribue.
Et si adstricti uitiis
Peccati sumus famuli
Sanguis tuus nos redimat
Et suos nos constituat.
Omnem mentis maculam
Omnesque sordes animae,
Christe, qui solus mundus es,
Absterge tua gratia.
Tranquillam nostram animam,
Mentem semper pacificam,
Tu, qui es pax uerissima,
Conserua, Deus, petimus.
Ubi enim pax fuerit
Tu ipse quoque aderis,
Et, ubi tu non deeris,
Quidquid ibi tutum est.
Veni ergo, Domine,
Et iugiter nos posside,
Ut tui sancti spiritus
Possimus templum fieri.
Gloria [sit] tibi pater
Cum tuo unigenito
Una cum sancto spiritu
In sempiterna saecula.