F5a Magnus miles mirabilis multis effulgens meritis Cuthbertus nunc cum Domino gaudet perhenni premio. Carnis terens incendia corde credidit Domino caduca cuncta contempnens caritatis officio. Legis mandata Domini letus impleuit opere largus libens lucifluus laudabatur in meritis. Fecit manare flumina fontis signo perpetui ubi nulla uestigia uidebantur fonticuli. Linguam resoluit uinculis longo tempore retentam petrosa terra segetem paruo produxit tempore. Illius nos auxilium deprecamur perpetuum ut mereamur dicere siue fine cum gaudio Gloria patri ingenito eiusque Unigenito una cum Sancto Spiritu in semiterna secula. AMEN.

F5b Oriens sol iusticie dignatus est illustrare per ministros lucis sue cunctos fines orbis ferre ipsi laus qui dedit Anglis lucernam sue salutis Cuthbertum bonum doctorem ac pro hiis intercessorem.

F5c Auctor donorum Spiritus inspirans uera uatibus per trimum fatur infantem Cuthbertum fore presulem. Qui Raphaelem archangelum Tobie dedit medicum Cuthberti genu languidum suum sanat per angelum. Dum iactantur puppes salo Sanctus orans heret solo mox uentorum uis mutata naues uertit ad litora. Edomans corpus iuuenis in undis pernoctat maris ibi Deo uota laudis ex affectu reddit cordis. Mirum dictu hinc egresso et oranti genu flexo membra refouent rigida equoris animalia. Adest frater curiosus explorans quid agat iustus quem languore et pauore mox correptum sanat prece.

F5d Quandam uexatam demone pergit sanctus inuisere sed mox dirus fugit hostis fit mulier incolumis. Multos hic sanauit egros languores depellens seuos multas effugauit laruas uirtute crucis territas. Sanctus antistes Cuthbertus uir perfectus in omnibus in turbis erat monachus digne cunctis reuerendus.

F5e Christi fortis hic athleta ac uerus anachorita mundi tempsit hec infima quo celi caperet summa. Qui de rupe prompsit aquam post in uinum uertens eam hoc utrumque donum suo caro contulit Cuthberto. In episcopatu suo Iam exacto biennio ut soli uacaret Deo dilecto se reddidit antro. Hinc tanguntur artus sacri corporis morbo letali sciens uero [se] resolui confortat ouile Christi. Mox pater suos affatur Quisque uestrum tempnat mundum amet Christum colat bonum Sic supernum sumet regnum.

F5f Languor accrescens in dies artus uexabat fragiles ipse sacras fundens preces celicas pregustat laudes. Dum terrenis redit dies eterno Cuthberto dies salutares sumit dapes sic supernas scandit sedes.

F5g O magne presul Cuthberte cui Christus fuit uiuere cui mori lucrum perhenne dum post mortem uiuis uere signis diuinis inclite languidos sana[n]s a labe hoc rogamus pia prece tu pro nobis intercede.

F6: Hymn ? Poem in Sapphics on St Æthelwold [ed. AH 23, 209; 43, 107; PL 137, col. 105] Inclitus pastor populique rector Cuius insignem colimus triumphum Nunc Adeluuoldus sine fine letus Regnat in astris. Qui pater noster fuit et magister Exhibens sacre documenta uite Et Deo semper satagens placere Corde benigno. O diem sanctum, celebrem, choruscum Quem Dei nobis pietas sacrauit, Ut patri tanto mereremur almum Promere tantum. Nunc eum nisu rogitemus omni Abluat nostrum pius ut reatum Et sua sancta prece nos ad altum ducat Olimpum. Sit Deo soli decus et potestas Laus in excelsis honor ac perennis Qui suis totum moderans gubernat, Legibus orbem. AMEN