# Hymns for St Dunstan (3)

# F4a
Ave, Dunstane, presulum
Sidus decusque splendidum,
Lux vera gentis Anglice
Et ad deum dux praevie.
Tu spes tuorum maxima
Dulcedo necnon intima
Spirans odorum balsama
Vitalium melliflua.
Tibi pater nos credimus
Quibus te nil iocundius
Ad te manus expandimus
Tibi preces effundimus.
Oves tuas pastor pie
Passim premunt angustie
Mucrone gentis barbare
Necamur en cristicole.
Offer sacerdos hostias
Christo precum gratissimas
Quibus placatus criminum
Solvat catenas ferreas.
Per quas Anglorum terminis
Ecclesiaeque filiis
Et nationes perfide
Pestesque cedant noxiae.
Per te pater spes unica
Per te proles pax unica
Et spiritus lux unica
Adsit nobis in secula.

# F4b
Per te nitescat rex deus
Nox ista luce clarius
Illuminat quam transitus
Tui Dunstani splendidus.
Hunc matris inter viscera
Tua repletum gratia
Adusque mortis tempora
Magna ditasti gloria.
Per huius en insignia
Christi tui preconia
Sanctorum inter agmina
Crementa captant aurea.
Et mater virgo ecclesia
Eius sequens vestigia
Ad patriam felicibus
Anhelat morum passibus.
Hinc laus honor hinc gloria
Deo patri cum filio
Sancto simul paraclito
Nunc et per cuncta secula.

# F4c
Dunstanus en celestia
Orans petit palatia
Sequamur desiderio
Hoc consonantes cantico.
Ascensor euge celice
Regnator ac olimpice
Felix coronis utere
Deique regnum posside.
Per hec rogamus gaudia
Que nunc petis perennia
Hec festa nobis prospera
Tuis coronis fulgida.
Nobis deum et nos deo
Offer pio suffragio
Ubi cum angelis tuo
Communicemus gaudio.
Presta pater per filium
Presta per almum spiritum
Ut Dunstani ad consortia
Tua tendamus gratia.