Diebus Dominicis
1a. Christicolarum sacrosancta
1b. Lacrimentur contubernia,
2a. Atque scelera
innumera
2b. Secum reputans
quisque sua,
3a. Carnea
terrae prosternens robora,
3b. Valida
et manu tundat pectora,
4a. Et voce lacrimosa
gemituque plena
prorumpat in haec verba:
4b. Deus, cuius dextera
providetur trina
mundi machina pulchra,
5a. Dele peccata,
quae ego nefande
peregi commaculando
corporis membra;
5b. Ut sit nitida
mens mea, concedat
gratia nunc pietate
tua fecunda.
6. Prosperrima mihi praesta,
omnia releva contraria,
7. Ut post clausa spatia
mundi ad regna
pervenire queam siderea.