# De sanctis Martyribus

1. Arguta plectro syllaba
concrepante
promite martyrum praeconia.
2a. Compta vernante melodia,
canite lenta tremula,
2b. Divina floridi gratia,
hilares et laetitia.
3a. O quam salubria,
o tua splendida,
Domine, o quam lucida
semper munera!
3b. Laus et victoria
martyrum inclita,
Deus, o tu quam fulgida
sanctis gloria!
4a. Candidula
turba te nimia
fidei clarissima
sequens anima
4b. Labilia
lubrica culmina
saeculi contempserat
atque lubrica.
5a. Qui pro te ferocia
sustinuere verbera,
vincla, tormenta,
per supplicia
fessi maxima,
5b. Sacra testimonia
cordis intimo condita,
patientia
quos refecerat
et constantia.
6a. Tortor, insana
captus insania,
torquet aspera
dira sanctos ungula,
6b. Pellens ut ligna
mente apostata
proni supplica
voce ferant munia.
7a. Sed mens alma patria
lege praemonita,
firma petra fundata,
cedere nescia,
spernens iura tyrannica,
7b. Profitetur unicam
fide catholica
trinitatem supera,
infera, media,
cunctam quae regit machinam.
8a. Sic indomabili
caelestia
sectantes carismata,
sic angelicam
secti colla
intrant patriam,
8b. In qua purpurea,
perspicua
et perenni gemmea
compti laurea
tibi pulchra
sonant cantica.
9a. Quorum festiva
benigne gaudia
et laudantes sollemnia
tu nos, o domine, salva,
libera.
9b. Quo sempiterna
donati gratia
cum martyribus aeterna
laetemur semper fulgida
patria.
10. O bone Christe, da caelestia
da nobis alma caelica
perpetuae vitae regna.