1. Psallat ecclesia, mater decora, 2a. Mente devota et voce consona Domino pia personet organa. 2b. Laudes cantica iubilans persolvat, cordis dulcia feriens tympana, 3a. Recolens sollemnia atque festa diei gaudia, 3b. Swithunus in qua alta laetus scandit caelorum culmina, 4a. Evangelica radians gratia ut lampas splendida. 4b. Noctis tenebras effugat, erroris amputat scandala. 5a. Semina verbi sancta et catholica 5b. Per populorum arva Deo seminat. 6a. Talenta sibi credita a patre familias 6b. Multiplicat et augmentat usuris dominica. 7a. Plenus sapientia millena animarum Deo lucratur agmina. 7b. Oves sibi creditas divina per pascua pastor pervigil educat. 8a. Ad cuius ossa sepulta Dei gratia virtutum miracula ad laudem suam percelebrat. 8b. Unde nos tanta precamur patris merita, ut nos ad caelestia secum pertrahat palatia. 9a. Ubi vita, claritas aeterna et immensa laetitia, 9b. Ubi sancta angelorum turma Deo personat cantica 10.Voce clara.