In Epiphania Domini (6 January ?)
1. Gaude, virgo ecclesia,
2a. Christi et tuas recolens
spirituales nuptias,
2b. Quas reges magi celebrant
dona ferentes mystica.
3a. In his omnia a sponso-
conduntur nova
divina potentia;
3b. Aquas legales in vina
evangelica
vertit virtute sua.
4a. Hac in die fluenta
sacrat Iordanica;
4b. Rex et caeli Dominus
servo se inclinat,
5a. Insons ipse tuas
lavans maculas,
5b. Ut sis ei sancta
et incorrupta,
6a. Thoro eius digna
et regali corona,
6b. Mater filiorum,
virgo tamen intacta,
7a. Ut et secum praevaleas
habitare
in caelesti curia
7b. Et, qua corda exhilarat,
angelica
perfruaris gloria;
8. Quo nos ipse
sibi servientes
perducat.