In Resurrectione Domini
1. Concinat orbis
cunctus Alleluia,
2a. Votis, voce sollemnia
2b. Celebrando paschalia.
3a. Insontum tenera
3b. Congaudeat turma,
4a. Sacro fonte nivea,
4b. Spernens Phlegetontis undas.
5a. Nos quoque laxas
aptemus fibras
arte musica,
5b. Voce sonora,
modificantes
prosis neumata
6a. Voce satis tinnula.
Christus namque
mitis hostia
6b. Factus nostra
ob remedia
Crucis pertulit probra,
7a. Et iugis vita
manens subiit lethalia,
7b. Fellis amara
passus praelibare pocula;
8a. Vulnera satis
toleravit dira
transfixus clavis et lancea.
8b. Sic patiendo
mala gerens nostra
descendit ad ima tartara.
9a. Hostis antiqui
quo defringens arma
revehit potens ampla
ovando tropaea,
9b. Sicque devicta
morte ac resumpta
carne resurgit victor
die hodierna.
10a. Unde iam iucundas
ipsi canamus odas,
10b. Per quem nobis vita
redit aeterna
11. Et caeli clara
nobis patescit aula;
cui sit laus praeclara.