# In s. Petro ad Vincula

1. Sollemnitate rutilans
apostolica
lux adest gloriosa,
2a. Qua recolit
festa Petri ecclesia
2b. Supra fidem
ipsius aedificata.
3a. Providentia utique
divina contemptibilia
3b. Ignobiliaque mundi
legit, ut perderet fortia.
4a. Unde Petrum vocavit
natum Bethsaida
4b. Iesus, dum iret iuxta
Galilaeae litora.
5a. Quam accepta
quamque gloriosa
fuere haec
commercia!
5b. Pro dimissa
navicula datur
ei regenda
ecclesia.
6a. Quique pisces trahebat
de maris aqua,
ipse de mundi tractus
est unda,
6b. Utque alios trahat,
magna sibi a
Christo datur virtus et
gratia.
7a. Nam et ei, cenae mira
quando celebrabantur
sollemnia,
7b. Pro amore quo fervebat
animarum traduntur
ovilia.
8a. Ipse claudum, qui iacebat
ad portam
templi, divina
virtute functus elevat,
8b. Quia claudicantem prius
Iudaeam
nova fidei
virtus levantura erat.
9a. Ipsius virtute miranda
alitrix egenorum sancta
Quae vita caruit
resurrexit Tabitha.
9b. Visione sibi ostensa
centurioni gloriosa
Fidei minister
propinavit pocula.
10a. Huius oratione devota
10b. Sancta protegatur ecclesia,
11. Laudatura Deum
cum sanctis in aeternum.