In ss. Petro et Paulo
1. Agmina laeta
plaudant caelica,
2a. Aurea hac luce,
quam sacrat
lux apostolica,
2b. Quam Petri Paulique
germana
decorat laurea.
3a. Nam Petrus catholicam
toto orbe positam,
sub Christo
regit ecclesiam;
3b. Quam Paulus sublimia
fundatam per dogmata
ad regna
provehit supera.
4a. Petrus, virtute sancta
vincens Simoniaca monstra,
triumphat in gloria;
4b. Paulus herile sperma
contorquens Elymae gemella
obcaecavit lumina.
5a. Petrum marmoris salsa
spoliantem profunda
divina vocavit tuba,
capturam
quo trahat humanam;
5b. Paulumque, in Iudaea
torquentem Christi membra,
de sede clamavit alta
perlustrans
hunc alma doctrina.
6a. Eia, praecelsa
nunc angelica turma
concrepa, et resulta
voce clara Christi praeconia,
quem confessus est ima
Petrus in patria.
6b. Paulus arcana
contemplans super aethra,
lucifer inter astra,
totum mundum clarusirradiat
et ad vitae pascua
credentes advocat.
7a. Petrum ferrea
stringunt lora,
sed lux eripit angelica;
unde pio corde laeta
congaudet ecclesia;
7b. Paulum aspera
inter vincla
signa comitantur maxima,
donec urbis Romae celsa
visitaret culmina.
8a. Petrus omnia
verbo sanat infirma,
praestans caecis lumina,
suscitans cadavera,
dans et bonis cuncta,
cunctis bona.
8b. Adsunt gemina
in Roma candelabra,
quorum lucent lumina
inter mundi climata
solis ab exortu
et occasu.
9a. Haec inter tanta famina
caeli conscendunt gaudia,
hac die sancta;
9b. Per quorum nos suffragia,
Christe salvator, adiuva
atque conserva
10. Per saecla.