De s. Iusto
1a. Fulget dies iucunda
in qua Christi
gaudet ecclesia
1b. Pro martyris aeterna
sancti Iusti
palma et gloria.
2a. Aetas tenera,
virtus in qua sed valida,
2b. Mundi prospera
temnit ac vincit fortia.
3a. Gratia quem Deus mira
facit in ipsa
pollere infantia,
3b. Prophetiae illi dona
mox et ab ipsa
donans pueritia.
4a. Patri denique praescia
de captivo
pandit alumno monita:
4b. “Tecum,” inquit, “ad propriam
volo, pater,
hunc revocare patriam.”
5a. Mater ad haec verba
toto corde commota
inquit Felicia:
5b. “Proles mihi cara,
fili mi o Iuste, quid
loqueris talia?
6a. Si quae adversa tibi
in via
contingant, ego pro te
magna flebo tristitia.”
6b. “Noli, mater mi,” inquit,
“plorare;
inter omnia Christi
me liberabit gratia.”
7a. Freti virtute angelica,
pergunt longinqua itinera,
fratrem liberant.
7b. Iusto puero praefulgida
praeparata ante saecula
adest gloria.
8a. Terrea passus membra,
caelo dans animam,
8b. Candida, rubicunda
fulget in purpura.
9a. Omnes una
te voce supplica
Tuam commenda,
precamur,
Christo familiam,
9b. Et in aeterna
fac tecum
esse laetitia.
Laus Deo magna
per cuncta saecla.