# Abecedarian hymn for St Nynia

Arbiter altithronus, solus deus omnicreator,
Maiestate potens, arbiter altithronus,
Blandus in arce poli genuit de lumine lumen,
Principium et finis, blandus in arce poli.
Crescit ubique patens aeterni gloria regis,
Rex dominusque pius crescit ubique patens.
Debita pena reos tenuit pro crimine prisco,
Linquerat in domino debita pena reos.
Error ab orbe ruit medico ueniente superno,
Dum patitur Christus, error ab orbe ruit.
Florida quem genuit mater sine patre fecunda,
Virginitas felix florida quem genuit.
Gaudia longa tenet cum uirginitatis honore,
Quae genuit dominum, gaudia longa tenet.
Hostia summa patris mundum de morte redemit,
Caeli sceptra petit hostia summa patris.
Iure micat rutilo sanctorum gloria celo,
Lux ueneranda polo iure micat rutilo.
Karus in arce nitet coniunctus ciuibus illis,
Antistes Nynia carus in arce nitet.
Lumina cordis habens terras lucebit in omnes,
Iam super astra nitet lumina cordis habens.
Mitis in orbe pater multa miracula gessit,
Federa firma tenet mitis in orbe pater.
Noster in orbe decus squamoso corpore lepram
De tumulo purgat, noster in orbe decus.
Omnia posse dedit benedictio larga tonantis,
Intemerata fides omnia posse dedit.
Pausat in aula sacer tumulatus corpore praesul,
Culmine sub templi pausat in aula sacer.
Quem deus ethereis ornatum iure triumphis
Vexit ad astra poli, quem deus ethereis.
Regna beata manet, qui castis moribus istic
Vixerat in domino, regna beata manet.
Spiritus astra petit casto de corpore latus
Angelicis manibus, spiritus astra petit.
Te medicante, deus, hominum tot uulnera curat,
Morbi diffugiunt te medicante, deus
Viscera casta uomant firmissima caute soluta
Virtutum pocula uiscera casta uomant.
Xristus in aula poli claro redimiuit honore
Pontificem Nyniam, Christus in aula poli.
Ydrus in orbe gemit Christo dominante per orbem,
Lumen adesse dei ydrus in orbe gemit.
Zemma parata manet nigidis cumulata tenebris,
Quo redeunt miseri zemma parata manet.
Alma quiete boni pausant per secula cuncta
Laudantes dominum alma quiete boni.
Mystica uerba canunt ad regia uota fideles
Agmina sancta polo, mystica uerba canunt,
Et tibi perpetuo modulantur carmina regi
Nocte dieque simul et tibi perpetuo.
Nobilitasque poli sanctis concentibus illic
Excubat obsequio nobilitasque poli.