F2a Rex angelorum dominator orbis Palma sanctorum decus et corona Laus tibi quia rutilat Osuualdus Presul in astris. Hunc ut descendens iubar arce poli Criste splendere populo iussisti In thronozatum solio decentem Pontificali. Hic mitis, castus humilisque largus, Gemma et uite speculumque legis Multis adfructus sibi ad coronam Iure refulsit Qui postquam felix meruit coruscos Scandere celos medecine dona Contulit egros sua quo non pollent Membra sacello. Hic te pro nobis rogitet tonantem Cui laus uirtus honor atque perpes Qui trinus regnat Deus adque unus Omne per euum.

F2b Celi uernantem patriam Lucis in mensam gloriam Osuualdum sanctum dulcibus Letis canamus cantibus. Gemma uite qui fulserat Hac in uita dum manserat Archipresul angelicis Semper intentus studiis. Scala fuit et aurea Plures tollens ad sidera Ubi triumphat Domini Ante thronum altissimi. Hoc polo perstillantia Iam promisere miracula Eius ad glebam dantia Egis cara malogmata. Cuius prece propitius Sit nobis Christus Dominus Trinum et unum omnia Quem laudant Deum secula.

F2c Inclite pater super astra pollens. Sancte Osuualde Domini dilecte Presul et alme uenerandus orbe: Salue per euum. Tu nos a cunctis precibus dilectis Munda per Christum petimus tonantem Nosque alumnos proprios guberna Vt pater almus. Tu nos peccatis releua iacentes Nobis et opem tribue paternam Clemens et procul mala cuncta pelle Pastor honeste. [...] nobis cuncta bona per [...] Nostri et [...] Domini pax crescat. Et post hanc uitam capiat nos clara Aula polorum. Prestet hoc pater Deus adque natus Spiritus sanctus cui laudem dicat Omne quod spirat pie trinitati Cuncta regenti.