# Poem on a Church dedicated to St Mary (Aldhelmian cento: based on CE)

Hic veneranda rudis sacrantur culmina templi,
Grandia quae christi gestant vexilla triumphis.
Hac celebratur honor sanctae genetricis in aula,
Ardua regnorum quae nunc super ethera flagrat.
Maria, quae gremio sobolem portare beatum
Et dominum mater meruisti gignere natum,
O novum in mundo lumen te virgine fusum
Sceptra tenens celi christus processit in orbem.
Femina o felix et fortunata virago,
Quae iubar inmensum promsisti sole paterno,
Tu decus astrorum terraque poloque refulgens,
Quaeque salutiferi gestabas membra tonantis
Numine divino sortita puerpera prolem,
Ausculta clemens populorum vota precantum,
Marcida qui riguis umectant imbribus ora
Et prece flagranti torrent peccamina vitae
Semper in ede nova christi genetrice dicata,
Quatenus hic scelerum detur indulgentia perpes
Densa de pietate fluens et fronte paterno,
Dignis qui numquam populis torrescit in evum.