Alma lucerna micat, sol aureus arva serenat, Summus Adelwoldus alma lucerna micat. Belliger iste Dei fortissima bella peregit Acer in arma ruit belliger iste Dei, Cuius ab ore sacro fluxerunt dogmata vitae, Hausimus omne bonum cuius ab ore sacro. Dulce poema tibi nunc gliscimus edere patri, Suscipe, quod canimus, dulce poema, tibi. Ecce, coruscat apex tibi pontificalis abunde, Quem sine fine tenes, ecce, coruscat apex. Fons et origo boni populo te praetulit isti, Te monitore patet fons et origo boni. Gloria, laude potens hac te collustrat in aula, Te comitata nitet gloria, laude potens. Huius amore gregis metuenda pericla subisti, Pellens hinc fortes huius amore gregis. Inclitus atque pius te rex adamaverat Eadgar Consensitque tibi inclitus atque pius, Kastra beata Dei quo centuplicares in Anglis, Milia constituens castra beata Dei. Laudibus innumeris tibi turba monastica plaudit Coniubilatque tibi laudibus innumeris. Moenia celsa domus tua cura novaverat huius Erexitque huius moenia celsa domus. Nocte dieque sacrum precibus tuebaris ovile, Complens servitium nocte dieque sacrum, Omnibus inque locis sparsisti semina lucis Expuleras tenebras omnibus inque locis. Pervigil esto tuis, petimus, protector alumnis Et pater et pastor pervigil esto tuis. Quod tibi complaceat, fac nos persolvere pensum Reddere et officium, quod tibi cornplaceat. Respuat alma fides in nobis omne, quod odis, Spurcitiaeque nefas respuat alma fides. Solve, pater, miseris Petri vice, solve catenas, Vincula cuncta reis solve, pater, miseris. Transfer ad alta poli pueros, quos ipse nutristi, Nos prece continua transfer ad alta poli, Vocibus angelicis ibi quo psallamus ovantes Laudemusque Deum vocibus angelicis. Xristus ut hic faveat votis, sis fautor opimus, Sis pius auditor, Christus ut hic faveat. Ymnifer iste chorus resonat tibi carmina laetus, Sit iugiter gaudens hymnifer iste chorus. Zelus in hoste gemit, tua nos benedictio munit, Nos tua vita regit, zelus in hoste gemit. Aspice, sancte pater, quae nos adversa fatigant, Quae mala nos lacerant, aspice, sancte fater. Mitis adesto tuis, clemens, pius atque benignus Compatiens famulis mitis adesto tuis. Erue, pastor, oves, animo quas semper amasti, Et tibi commissas erue, pastor, oves. Nos super aethra poli cuneis adiunge supernis Et duc post mortem nos super aethra poli.